គំរោងដ៏គួរឲ្យរីករាយ! An Exciting Announcement!

សួស្តីម្តងទៀត!

ប្រហែលជាបីខែមកនេះ ខ្ញុំមិនដែលបានបន្ទាន់សម័យប្លុគផ្ទាល់ខ្លួនរបស់ខ្ញុំទេ ដោយសារតែមានភារៈរវល់ផ្ទាល់ខ្លួនបន្តិច។ ខ្ញុំសង្ឃឹមថានឹងអាចឆ្លៀតពេលមមាញឹករបស់ខ្ញុំសរសេអំពីការគិតរបស់ខ្ញុំចំពោះស្ថាបត្យកម្ម។

ថ្ងៃនេះ ខ្ញុំគ្រាន់តែចង់ចែករំលែកពត៌មានដ៏គួរជាទីសោមនស្សដល់អ្នកទាំងអស់គ្នាដែលបានចូលអានក្នុងប្លុគមួយនេះ!

ដូចអ្នកទាំងអស់គ្នាប្រហែលបានស្គាល់ ឡឺ ក័រប៊ុយសីុយ៉េ ហើយ និងសៀវភៅប៉ុន្មានក្បាលដែលគាត់បានសរសេក្នុងនោះមានជាអាទិ៍ ៖ Ver Une Architecture (ឆ្ពោះទៅរកស្ថាបត្យកម្មមួយ ឬក៏អាចបកប្រែបានថា ឆ្ពោះទៅរកស្ថាបត្យកម្មស្ថាបត្យកម្មថ្មីមួយ)  Le Voyage d’Orient (ដំណើរឆ្ពោះទៅទិសខាងកើត) Le Modulor (ឡឺ ម៉ូឌុយឡឺរ) ជាដើម។ ដោយសារសៀវភៅទាំងនេះប្រៀបដូចជាស្នាដៃឯកក្នុងស្ថាបត្យកម្មសម័យទំនើប* ហើយវាក៏ជាការចាប់ផ្តើមនៃយុគថ្មីរបស់ស្ថាបត្យកម្ម ដូចនេះខ្ញុំក៏សំរេចចិត្តជ្រើរើសសៀវភៅខ្លះមកបកប្រែជាភាសាខ្មែរ។ ការពិតទៅ នៅស្រុកខ្មែរយើងក៏មានស្ថាបត្យករដែលទទួលឥទ្ធិពលពីគំនិតនៃស្ថាបត្យកម្មសម័យទំនើប*នេះដែរ។ បើយើងក្រឡេកទៅមើលឆ្នាំមាសនៃស្ថាបត្យកម្មនៅស្រុកខ្មែរនាទសវត្សទី៦០ យើងឃើញថាស្ថាបត្យករឆ្នើម វណ្ណ ម៉ូលីវណ្ណបានទទួលឥទ្ធិពលពី ឡឺ ក័រប៊ុយសីុយ៉េ តាមរយៈការប្រើរង្វាស់ខ្នាតឡឺម៉ូឌុយឡរសឹងតែទៅលើគ្រប់អាគារដែលគាត់បានរចនា សូម្បីតែរង្វាស់ធ្នឹមរបស់អាគារបុរីមួយរយខ្នង។

អ្នកខ្លះប្រហែលជាគិតថា សៀវភៅទាំងអំបាលមាននេះសរសេឡើងតាំងពីទសវត្សទី៣០ ឬក៏ទី៥០ អុីចឹងទៅប្រហែលវាហួសសម័យទេដឹងក្នុងការរៀនពីវា ឬក៏វាជាអំពើឥតប្រយោជន៍សោះឡើយក្នុងការបកប្រែរបស់ចាស់ៗទាំងអស់នេះ។ មិត្តភក្តិដែលរៀនស្ថាបត្យកម្មដំណាលខ្ញុំខ្លះមិនដែលផ្តល់កិត្តិយស ឬយល់ព្រមសោះឡើយថា លោកតាវណ្ណ ម៉ូលីវណ្ណដែលទទួលឥទ្ធិពលខ្លាំងពី ឡឺ ក័រប៊ុយសីុយ៉េ ថាជាស្ថាបត្យករឯកនៅក្នុងស្រុកខ្មែរ ដោយគេលើកឧទាហរណ៍មិនសមស្របជារឿយៗថា គាត់(វណ្ណ ម៉ូលីវណ្ណ)គ្រាន់តែជាស្ថាបត្យករម្នាក់ដែលគ្មានអីអស្ចារ្យនោះទេ ដោយហេតុតែគាត់មានអ្នកពូកែៗនៅក្បែរច្រើននៅទសវត្សទី៦០ ហើយគាត់គឺជាស្ថាបត្យករខ្មែរក្នុងជំនាន់ទីមួយនៅស្រុកខ្មែរ អីុចឹងហើយទើបគាត់មានឪកាសបានរចនាអាគារសាធារណៈរបស់រាជការធំៗច្រើននៅសម័យនោះ។ គំនិតទាំងនេះ វាគឺជាការគិតដ៏អវិជ្ជាមែនទែនក្នុងវិស័យស្ថាបត្យកម្ម មែនអត់? ខ្ញុំគិតថាអុីចឹង ព្រោះខ្ញុំក៏ធ្លាប់ធ្លាក់ក្នុងអន្លង់ខ្លៅមួយនេះដែរកាលពីពេលខ្ញុំនៅជាសិស្សរៀនស្ថាបត្យកម្ម មុនពេលដែលខ្ញុំចាប់ផ្តើមធ្វើជាសិស្សហាត់ការនៅក្រុមមគ្គុទេសស្ថាបត្យកម្មខ្មែរនាឆ្នាំទី០៣។ ខ្ញុំនាពេលនោះគិតដូចអ្នកទាំងនេះអីុចឹង តែក្រោយពីបានអានអត្ថបទខ្លះអំពីលោកតា វណ្ណ ម៉ូលីវណ្ណ រៀនពិនិត្យអង្កេតទៅលើស្នាដៃគាត់នារយៈពេលបីឆ្នាំមកនេះ ខ្ញុំបានផ្លាស់ប្តូរការគិតរបស់ខ្ញុំខ្លាំងមែនទែន ដោយខ្ញុំសង្ឃឹមថាខ្ញុំអាចក្លាយជាស្ថាបត្យករដែលពូកែដូចលោកតាតែមួយភាគបីនៃគាត់តែប៉ុណ្ណោះ។ ខ្ញុំសូមអត្ថាធិប្បាយពីលោកតាតែប៉ុននេះចុះ ដោយប្រហែលជាត្រូវវែកញែកពីលោកតានៅអត្ថបទក្រោយទៀតក៏មិនដឹង!

ហេតុផលខាងលើនេះគ្រាន់តែជាអំណះអំណាងដ៏តិចតួចស្តួចស្តើងដែលខ្ញុំលើកឡើងជាទឡ្ហីករការពារការបកប្រែរបស់ខ្ញុំពីសៀវភៅខ្លះរបស់ ឡឺ ក័រប៊ុយសីុយ៉េ។ សៀវភៅទាំងនេះ ថ្វីត្បិតតែសរសេឡើងតាំងពី៧០ ឬក៏៦០ ឆ្នាំមុន តែវានៅតែអាចបម្រើប្រយោជន៍ជាអាហារគំនិតដល់ស្ថាបត្យករវ័យក្មេងទាំងឡាយ។ ចំពោះខ្ញុំ ស្នាដៃអស់នេះគឺវាលើសពីស្ថាបត្យកម្មទៅទៀត វាគឺជាទស្សវិជ្ជានៃស្ថាបត្យកម្ម។ បើអ្នកអានទាំងឡាយគិតថាស្ថាបត្យកម្មគួរតែជាអ្វីដែលផ្សារភ្ជាប់ទៅនឹងការគិតច្រើនជាង សូមអានសៀវភៅទាំងអស់នេះចុះ។

ខ្ញុំបានជ្រើរើសសៀវភៅ Le Modulor (ឡឺ ម៉ូឌុយឡឺរ) ជាស្នាដៃបកប្រែលើកទីមួយ ដោយសារតែវាសៀវភៅមួយក្បាលដែលផ្តោតលើគំនិតជាទ្រឹស្តីផង និងក៏ជាការអនុវត្តក្នុងស្ថាបត្យកម្មផង។ ខ្ញុំគិតថាស្ថាបត្យករទាំងពីរប្រភេទនឹងអាចអានវាបាន។

សៀភៅ ឡឺ ម៉ូឌុយឡឺរ

CCI20062016

ខាងលើនេះជាសៀវភៅ Le Modulor (ឡឺ ម៉ូឌុយឡឺរ) ដែលខ្ញុំនឹងធ្វើការបកប្រែទៅជាភាសាខ្មែរ។ ខ្ញុំបានទទួលសៀភៅនេះជាអំណោយថ្ងៃកំណើតពីសង្សារខ្ញុំមកពីប្រទេសអង់គ្លេស។

តាមពិតខ្ញុំចង់បកប្រែពីច្បាប់ដើមជាភាសាបារាំងដែល ឡឺ ក័រប៉ុយសុីយ៉េ សរសេផ្ទាល់ដៃ តែជាអរកុសលខ្ញុំមិនចេះភាសាបារាំងទេ ដូចនេះខ្ញុំក៏បកប្រែវាចេញពីច្បាប់បកប្រែជាអង់គ្លេសវិញ។ ខ្ញុំដឹងថាអត្ថន័យប្រហែលជាចាកឆ្ងាយពីអត្ថបទដើមខ្លាំង តែសូមកុំបារម្ភអីពីព្រោះខ្ញុំនឹងផ្ទៀងច្បាប់ជាភាសាអង់គ្លេស នឹងច្បាប់ដើមជាភាសាបារាំងដំណាលគ្នា។ ខ្ញុំសង្ឃឹមថាការបកប្រែមួយនេះនឹងបញ្ចប់សព្វគ្រប់នាចុងឆ្នាំនេះ ហើយខ្ញុំអាចដាក់វាឲ្យទាយយកបាននៅលើ iBook Store របស់ Apple ហើយសង្ឃឹមថាកំរ៉ៃដែលរកបានវាគ្រប់គ្រាន់សំរាប់ខ្ញុំក្នុងការបោះពុម្ពសៀវភៅនេះដើម្បីចែកចាយតាមបណ្ណាល័យ និងគ្រឹះស្ថានសិក្សានានានៅស្រុកខ្មែរ។

សូមអរគុណ!

*  ស្ថាបត្យកម្មសម័យទំនើបក្នុងទីនេះសំដៅយកចលនាស្ថាបត្យកម្មដែលកើតឡើងប្រហែលទសវត្សទី៣០ ហើយល្បីខ្លាំងនៅទសវត្សទិ៥០ ៦០ និង៧០។ វាជាគំរូស្ថាបត្យកម្មមួយដែលប្លែកថ្មីមិនដូច រចនាបទ art deco ឬក៏ art nouveau ទេ។ ចលនាស្ថាបត្យកម្មនេះផ្តោតទៅលើការប្រើប្រាស់វត្ថុធាតុដើម និងគ្រោងអាគារធ្វើជាគ្រឿងលម្អរជំនួសឲ្យក្បាច់ភ្ញីផ្សេងៗ។ តាមរយៈ ឡឺ ក័រប៉ុយសុីយ៉េ គេអាចសំគាល់ចលនាស្ថាបត្យកម្មតាមរយៈធាតុផ្សំថ្មីៗចំនួនប្រាំដែលខុសប្លែកពីស្ថាបត្យកម្មដ៏ទៃទៀត។ តាមពិតទៅស្ថាបត្យករដទៃទៀតក៏បានចូលរួមបង្កើតចលនាស្ថាបត្យកម្មជាសាកលនេះដែរក្នុងកំឡុងពេលនោះ ហើយពួកគេមិនចាំបាច់រចនាអាគារទៅតាមអ្វីដែល ឡឺ ក័រប៊ុយសីុយ៉េ បានកំណត់ឡើយ។ ហេតុផលដែលខ្ញុំបានកំណត់សំគាល់ខាងក្រោមនេះ ដោយហេតុតែស្ថាបត្យកម្មសម័យទំនើបមានអត្ថន័យទូលំទូលាយជាងអ្វីដែលខ្ញុំចង់និយាយក្នុងអត្ថបទនេះ។ ន័យទូលំទូលាយរបស់វា ប្រហែលនឹងត្រូវអត្ថាធិប្បាយនៅអត្ថបទក្រោយ ឬអត្ថបទក្រោយមួួយទៀត ហើយប្រហែលវាត្រូវបកស្រាយដោយសិស្សច្បងខ្ញុំ យុាំ សុខលី ពីព្រោះតែគាត់បានពន្យល់ខ្ញុំឲ្យបានភ្លឺភ្នែកពីន័យនៃពាក្យនេះ មុននឹងពេលដែលយើងបានទៅចូលរួមក្នុងសន្និសិទស្តីពីស្ថាបត្យកម្មទំនើបនៅប្រទេសជប៉ុនជាមួយគ្នា។

 

 

 

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Create a website or blog at WordPress.com

Up ↑

%d bloggers like this: